ყველა რგოლის მენეჯერისთვის მნიშვნელოვანია ხარისხის აუდიტების იმ ძირითადი კონცეფციების ცოდნა, რაც მათ მისცემს საშუალებას გამოავლინონ ხარისხის პოტენციური ხარვეზები და ერთი მხრივ, გაზარდონ მათ მიერ წარმოებული პროდუქტის კონკურენტუნარიანობა, მეორე მხრივ კი, თავიდან აიცილონ პროდუქტის უხარისხობით გამოწვეული ხარჯები და უსიამოვნებები.

ხარისხის აუდიტების წარმართვის პროცედურა - შიდა აუდიტი იქნება ეს, მომწოდებლის თუ გარე აუდიტი, არსებითად თითქმის ერთი და იგივეა, მაგრამ არსებობს გარკვეული განმასხვავებელი ასპექტები, რომელიც აუცილებლად უნდა გავითვალისწინოთ.

ხარისხის შიდა აუდიტს ახორციელებენ შიდა აუდიტორები, რომელთა შერჩევა, დანიშვნა და მოქმედებების პროცედურები სათანადოდ უნდა იყოს გაწერილი და დაცული.

ერთ-ერთი სპეციფიკური სირთულე შიდა აუდიტორებისათვის არის ის, რომ ერთის მხრივ იგი უნდა იყოს გუნდის წევრი, ხოლო მეორე მხრივ კითხვები უნდა დასვას არსებულ პრაქტიკასთან დაკავშირებით და დაადგინოს არსებული ხარვეზები და სისუსტეები. ასეთ შემთხვევაში (შიდა) აუდიტორის ქმედებები ხარისხის სისტემის გაგრძელებაა და მისი მიზანია მინიმუმამდე შეზღუდოს მომხმარებლის მიმართ არსებული ხარისხის რისკი. ეს ყველაფერი კი მან უნდა მოახერხოს მაშინ, როდესაც თავად განსახილველი ხარისხის სისტემის ნაწილია.

შიდა აუდიტორის საქმიანობა შეიძლება განვიხილოთ სამ ნაწილად:

1. აუდიტორი: უნდა აღმოაჩინოს შეუსაბამობები ან პრობლემები, რომელიც შეიძლება შეუსაბამობებად იქცეს.

2. განმანათლებელი: უნდა ითანამშრომლოს იმ პირებთან, რომლებიც პროდუქტის და მომსახურების წარმოებაზე და კონტროლზე არიან პასუხისმგებელი.

3. კონსულტანტი: უნდა მისცეს რჩევა და დაეხმაროს შესაბამის თანამშრომლებს პრობლემის გადაჭრაში, როდესაც ეს შესაძლებელია; მაგრამ ეს აუდიტორის ფუნქციის მიღმა უნდა მოხდეს, რაც იმას ნიშნავს, რომ ერთდროულად რჩევის მიცემა და აუდიტის ჩატარება დაუშვებელია.

ამ ყველაფრის მიუხედავად, შიდა აუდიტორს გააჩნია მკაფიო მისია და მიზანი, რომელიც მენეჯმენტის მოთხოვნებს უნდა შეესაბამებოდეს. ამავდროულად, აუდიტორი მაქსიმალურად დამოუკიდებელი უნდა იყოს.

როგორც გარე აუდიტის შემთხვევაში, შიდა აუდიტის პერიოდულობაც უნდა ემყარებოდეს რისკზე დამყარებულ სტრატეგიას.

ამ კურსის მიზანია მონაწილეებში ხარისხის აუდიტების მიმართ ხედვის ჩამოყალიბება, აგრეთვე ხარისხის აუდიტების დაგეგმვის, ჩატარების, ანგარიშის შედგენის, მაკორექტირებელი და გამაფრთხილებელი ღონისძიებების (CAPA) პროგრამის მიდევნების უნარების შეფასება და განვითარების გზების დასახვა.  

 

რას მივიღებ კურსის გავლით

კურსის გავლის შემდეგ მონაწილეებს ეცოდინებათ ხარისხის საერთაშორისო სტანდარტების მოთხოვნები ხარისხის აუდიტის ჩატარების მიმართ, აგრეთვე გაეცნობიან სხვადასხვა სფეროში არსებულ პრაქტიკას ხარისხის აუდიტების ჩატარების თვალსაზრისით.

მსმენელები სპეციალური ტესტირებით შეაფასებენ საკუთარ უნარებს ხარისხის აუდიტის ეფექტურად წარმართვის და კონფლიქტების მართვის თვალსაზრისით.

მსმენელები ჩაატარებენ ე. წ. “ხარისხის სიმულირებულ აუდიტს” და პრაქტიკულად მიიღებენ განიხილავენ აუდიტის დროს ვერბალური და არავერბალური კომუნიკაციის თავისებურებებს.

ტრენინგის დასასრულს მონაწილეებს ექნებათ პრაქტიკული ცოდნა ხარისხის აუდიტების დაგეგმვის, ჩატარების, ანგარიშის შედგენის საკითხებში.

მონაწილეები მიიღებენ შესაბამის სერტიფიკატებს